Il-Banda Ċittadina La Stella AD 1863

Il-Banda “La Stella” tal-belt Victoria hija l-ewwel banda li twaqqfet legalment fil-gżira ta’ Għawdex, permezz ta’ kuntratt li jġib id-data tal-11 ta’ Jannar 1881. Madanakollu, kif tixhed referenza fl-istess kuntratt tat-twaqqif tagħha, il-banda tagħraf it-tnissil tagħha lis-sena 1863. Sa mill-ewwel sena tat-twaqqif tagħha sal-lum, il-banda dejjem tat kontribut mill-akbar lill-qasam mużikali u kulturali ta’ gżiritna. Matul il-medda tas-snin, il-banda “La Stella” tmexxiet minn surmastrijiet ta’ ħila kbira. Fl-1970 din l-għaqda mużikali għaddiet taħt l-idejn kapaċi tal-Prof. Mro Joseph Vella, kif għadha sal-lum. Din is-soċjetà mużikali hija uffiċjalment responsabbli mill-organizzazzjoni tal-festi esterni tal-patrun t’Għawdex San Ġorġ. Hija l-ewwel banda Għawdxija li daqqet programmi f’Malta u barra minn Malta. Esegwiet programmi mużikali f’uħud mill-aqwa pjazez ta’ l-Ewropa. Fl-istorja glorjuża tagħha, il-banda tal-belt Victoria, bla dubju għandha rekord ta’ ġrajjiet storiċi.